ភ្នំពេញ៖ ស្រ្តីចំណាស់ម្នាក់បានដួលសន្លប់នៅក្នុងបន្ទប់ទឹកផ្ទះជួលមួយកន្លែងនៅក្នុងខណ្ឌពោធិ៍សែនជ័យ អស់រយៈពេល ១សប្តាហ៍ ដោយម្ចាស់ផ្ទះជួលស្មានតែស្លាប់ទៅហើយ ក៏រាយការណ៍មកសមត្ថកិច្ចឱ្យមកចុះត្រួតពិនិត្យ ស្រាប់តែស្ត្រីចំណាស់នោះបានដឹងខ្លួនឡើងវិញបង្កការភ្ញាក់ផ្អើលដល់ពលរដ្ឋនៅក្បែរនោះ។

ហេតុការណ៍គួរឱ្យភ្ញាក់ផ្អើលនេះបានកើតឡើងនៅវេលាម៉ោងជា១រសៀលថ្ងៃទី១៥ ខែធ្នូ ឆ្នាំ២០២២ នៅតាមផ្លូវលំ ក្រុម៣ ភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។

ស្ត្រីចំណាស់នោះត្រូវបានអ្នកជិតខាងពុំឃើញចេញពីផ្ទះអស់រយៈពេល២សប្តាហ៍ រួមទាំងឆ្កែចំនួន ៤ក្បាលដែលស្ត្រីចំណាស់នោះចិញ្ចឹម។ អ្នកជិតខាងបានធុំក្លិនស្អុយចេញពីបន្ទប់ស្ត្រីចំណាស់នោះ រហូតដល់ម្ចាស់ផ្ទះចាក់សោរចូលទៅមើលក៏ឃើញស្ត្រីចំណាស់នោះបានដេកដួលក្នុងបន្ទប់ទឹក រួមទាំងមានឆ្កែចំនួន២ក្បាលបានងាប់ និងឆ្កែចំនួន២ក្បាលទៀតនៅមានជីវិត ដោយនឹកស្មានថាស្ត្រីចំណាស់នោះស្លាប់ ទើបម្ចាស់ផ្ទះរាយការណ៍មកសមត្ថកិច្ច។ លុះដល់ពេលសមត្ថកិច្ចធ្វើកំណត់ហេតុរួចហើយ រៀបនឹងធ្វើកោសល្យវិច័្ឆយ ស្ត្រីចំណាស់នោះនៅមានដង្ហើមនៅឡើយ ក៏បញ្ជូនស្ត្រីចំណាស់នោះទៅសង្គ្រោះនៅមន្ទីរពេទ្យព្រះកុសុមៈ។

តាមប្រភពព័ត៌មាន ស្ត្រីចំណាស់នោះមានអាយុ៧០ឆ្នាំ ជាក្រមុំចាស់ ដែលគ្មានសាច់ញាតិ ត្រូវបានម្ចាស់ផ្ទះចិត្តល្អម្នាក់បានអនុញ្ញាតឱ្យស្ត្រីចំណាស់នោះស្នាក់នៅដោយពុំគិតថ្លៃឡើយ រួមទាំងឱ្យចិញ្ចឹមសត្វឆ្កែចំនួន៤ក្បាលផងដែរ។

តាមប្រភពពីសមត្ថកិច្ច ស្ត្រីចំណាស់នោះបានដួលសន្លប់ដោយសារតែខ្យល់គ ដោយអាចរស់បាន

ដោយសារតែស្ត្រីចំណាស់នោះបានហូបទឹក។ ចំណែកសត្វឆ្កែចំនួន២ក្បាលដែលបានងាប់នោះ ដោយសារដាច់អាហារចេញពីផ្ទះមិនបានដោយសារជាប់សោរនៅខាងក្នុង ហើយឆ្កែចំនួន២ក្បាលទៀតនៅរស់ធម្មតា ប៉ុន្តែពុំមានកម្លាំងកំហែងឡើយ៕ 

^{PHOTO: Social media}